勞斯廚房

大家好呀...今日開始我會係"月經"開班, 教大家做中,西,甜品各式各樣美食...呵呵講笑啫...我還未有資格用"教"字啊, 不過我只係想同大家分享一吓, 自己做出黎既一啲美食, 我很喜歡整野食的, 整完出黎個滿足感好大, 尢其是有人欣賞..嘻嘻...
講番上面個啲曲奇餅, 第一張相個英文名, 你地係咪覺得好似"CARY"呢!..錯了, 其實係個"GARY"字黎架, 事關有一日我整開曲奇, 咁亞vava上咗黎我屋企, vava亦想玩埋一份, 然後佢諗都唔駛諗, 就"唧"咗個"GARY"字型出黎, 你地話呢個人係佢心目中既位置幾咁重要呢..(聽到個位係咪好冧呢!呵), 但因為時間關係, 要趕住返佢個重要人屋企係飯, 所以個"G"字有點斜咗, 咁睇起上黎變咗個"C"字, <注意: 小朋友唔好學呀, 還要家長陪同細心解釋啊!>, 不過唔緊要啦, 有心咪得囉!
下面個兩包係咪好靚呢, 出面街冇得買架(D曲奇), 個啲袋就專誠去買, 游游陪我一齊揀架~~

朱古力曲奇:
材料:
可可粉1湯匙 , 熱水2湯匙, 無鹽牛油 200克, 糖80克, 雞蛋1隻, 麵粉350克, 入爐朱古力釘, 雲呢拿香油適量

做法:

1. 可可粉加入熱水拌勻, 放泠備用.
2. 牛油切片, 分次加入糖打至鬆發.
3. 加入已拌勻雞蛋, 雲呢嗱油及可可粉溶液.
4. 麵粉分次篩好加入拌勻.
5. 加入朱古力粒, 搓成麵團, 用保鮮紙包好, 放置冰格1小時取出, 切片成約0.8mm一片, 或可放入唧袋, 唧出任可形狀.
6. 焗爐預熱180度, 把切好曲奇片放入, 焗15至18分鐘, 翻轉再焗3分鐘即成.

曲奇吹凍後才會變得鬆脆...
如果大家有興趣既, 不如一齊交流吓整美食心得啦...第二道美食係......大家等吓啦!